ИФТИХОР
Аскар ўғлим билан фахрланаман
Уч ўғилнинг онасиман. Фарзандларим камолини кўриб яйрайман. Айниқса, Илғорбек, Иқболбекларнинг аскар бўлганлигини кўрганимда бир она сифатида кўнглим ғурурга тўлганди. Акаларидай аскар бўлишни ният қилган кенжа ўғлим Икромжон ҳам айни пайтда қуролли кучлар сафида йигитлик бурчини ўтамоқда. Унинг қасамёд қабул қилган кунида олдида бўлиб, ўғлимнинг қувончига шерик бўлдик. Ҳали ҳам ёш деб юрган кенжатойимнинг ўзи сингари алп ўғлонларнинг сафида кўкрак кериб турганини кўрганда, кўзларим қувончдан ёшланди. Ҳа, менинг ўғлим Ватан ҳимоячиси.
Аскар бўлиш, ҳарбий кийим кийиб, Ватан олдидаги йигитлик бурчини ўташ ҳар бир ўғлоннинг орзуси. Акасининг ҳарбий кийимига ҳавас-ла боқиб, "мен ҳам катта бўлсам, албатта, аскар бўламан", дея унинг шапкасини кийиб "честь" берган болагинам бугун аскар.
Ватанга муҳаббат, унга хизмат қилишдек олий туйғу ҳар бир йигит қалбида болаликдан жўш уради. Бугун Ватанимиз сарҳадларини қўриқлаб турган мард ўғлонларимиз бор экан, юртимиз тинч, осмонимиз мусаффо. Биз оналарнинг кўнгли хотиржам, қўлларимиз эса ҳамиша дуода.
Нигорахон ЮСУПОВА,Олтинкўл тумани.
|