"МУШОИРА ЭТАДИ ДАВОМ"

Андижон ижтимоий иқтисодиёт педагогика коллежида Ўзбекистон халқ шоири Зулфия таваллудининг 100 йиллигига бағишланган "Мушоира этади давом" деб номланган адабий-бадиий тадбир бўлиб ўтди.

Вилоят ўрта махсус касб-ҳунар таълими бошқармаси, Андижон шаҳар хотин-қизлар қўмитаси, "Камолот" ЁИҲ Андижон шаҳар Кенгаши ҳамда шаҳар маданият ва спорт ишлари бўлими ҳамкорлигида ўқувчиларни вафо, садоқат куйчиси Зулфия ҳаёти ва ижоди ҳақидаги билимларини бойитиш, шоира ижоди орқали ёшлар маънавиятини юксалтириш, уларнинг қалбида она Ватанга муҳаббат туйғуларини мустаҳкамлаш мақсадида ўтказилган тадбирда ижодкор ёшлар томонидан Зулфияхоним шеърлари ўқилди, ёш санъаткорлар эса шоира шеърлари билан айтилувчи ҳамда Ватанни тараннум этувчи қўшиқлар ижро этдилар.

Тадбир доирасида ўқувчи ёшлар томонидан тайёрланган ижодий ишлар ҳамда мусаввирларнинг ижод намуналари кўргазмаси намойиш этилди. Якунда тадбирда фаол иштирок этган ўқувчи қизларга "Камолот" ЁИҲ Андижон шаҳар Кенгаши ҳамда ҳамкор ташкилотларнинг эсдалик совғалари, фахрий ёрлиқлари топширилди.

Ниҳоятда қизиқарли ўтган мазкур тадбир барча иштирокчиларда катта таассурот қолдирди.

Б. МАДАМИНЖОНОВ.