ҲАЁТ - ИБРАТ МАКТАБИ
БИЛМАЙИН ҚЎЙДИМ ҚАДАМ
Ҳафиза неча йиллик турмуш ўртоғининг хиёнатини кечиролмади. Ахир севишиб бир ёстиққа бош қўйганларига ҳам оз эмас, кўп эмас ўн саккиз йил бўлибди. Ўртада фарзандларининг борлиги ҳам оилани сақлаб қололмади.
Интернет орқали бошланган оддийгина танишув, салом-алик чуқурлашиб кетди. Муносабатлардаги бу чуқурлашув натижаси Шарофнинг хиёнатига сабаб бўлди. Дастлаб эрининг телефонга муккасидан кетиб "ёпишгани"га у қадар аҳамият бермаган Ҳафиза кейинроқ шубҳалана бошлади. Аёл барибир аёл-да! У қалбидаги исёнларга чек қўйиш баҳонасида эри кўчага иш билан чиққан пайт у телефонда ким билан гаплашаётганлигини билиб олди...
Энг ачинарлиси, турмуш ўртоғи барини очиқчасига тан олди. Ҳатто, Ҳафиза рози бўлса, ўша аёлни никоҳига олмоқчи эканини хотиржам айтди. Аёлнинг бошидан биров муздек сув қуйиб юборгандай бўлди...
Ҳафизанинг эри билан ажрашиши осон кечмади. Уй аёл ва фарзандлари номига ўтди. Эри кийим-кечагини йиғиштирди-да, интернетда танишган маъшуқасининг уйига кўчиб ўтди...
Мана шу воқеага ҳам салкам ўн йил бўлди. Ҳафиза ўзини фарзандларига бағишлади. Яқинда дугонасидан собиқ эри кейинги хотинини хиёнат устида ушлаб олганини эшитдию, қилғилик қирқ йилни ҳам кутмай қайтганига амин бўлди.
Бугун покиза оиласини аллақандай сайтларда танишган, телефонда ошиқ-маъшуққа айланган, насл-насаби тайинсиз аёлларга алмашаётган оила бошлиқлари, афсуски, учраб туради. Улар мулоҳазасизлик билан қўйган қадамларининг охири афсус ва надомат эканини асло унутмасликлари керак.
ЗАБАРЖАД.
|