МУЛОҲАЗА
Энг улуғ фазилат
Муқаддас китобларимизда ота-онага яхши муносабатда бўлиш энг улуғ фазилат эканлиги таъкидланади. "Уларга ёқимли сўз айт" дейилганда, "отажон", "онажон" каби ширин сўзлар билан ҳурмат кўрсатиб муомала қилиш, уларни ранжитадиган гаплар айтмасликни тушуниш керак.
Ота-онага яхшилик қилиш - амалларнинг энг яхшиси, ибодатларнинг энг улуғидир. Бу йўл инсонни жаннатга етказади.
Ота-онага яхшилик қилиш ҳар бир инсон учун ҳам фарз, ҳам қарздир. Фарзанд уларга ҳеч қачон қарши чиқмаслиги, хизматларидан бўйин товламаслиги лозим.
Гоҳо ошна-оғайни, хотини ёки фарзандларини ота-онасидан устун қўювчи кимсалар ҳам учраб қолади. Бундайлар ота-онаси қариб қолганда, уларга эътиборсиз бўлади ёки улардан номигагина хабар олиб туради. Ёхуд ота-онасига бақирадиган, улардан бир оғиз ширин сўзини қизғонадиган ношудлар вақти келиб, ўз фарзандларидан ана шундай ҳурматсизлик қайтишини унутмасликлари керак.
Айниқса, эрини ота-онасига эътиборсиз бўлишга ва жигарлари билан қариндош-уруғликни узишга ундайдиган аёлларга охиратда яхшилик йўқдир. Агар биров бизга бир бор яхшилик қилса, уни бир умр эслаб юрамиз. Бошқаларнинг кўнглини олишга уринамиз-у, аммо не-не машаққатлар билан боққан инсонларнинг кўнглини кўтариш, шод қилиш ҳақида баъзан унутиб қўямиз.
Ота-онамиз ёнимизда эканларида, соч-соқоллари оқариб, беллари букилганида, қўл-оёқлари қалтираб, юриш-туришлари қийинлашганда, хасталикка йўлиққанларида уларга тиргак бўлайлик, жонига оро кирайлик. Кўнгилларини хушнуд этайлик. Улар учун молимиз ва кучимизни аямайлик. Шундагина биз ҳам ўз фарзандларимиздан яхшилик кўрамиз.
Жўрабек ЭРГАШЕВ,
Балиқчи тумани.
|