ДИЛ ТУҒЁНИ
Меҳрингизга ташнаман
Бугун яна тушимга кирдингиз. Жуда яқингинада, қулоқларим остида меҳрибон овозингизни эшитгандай бўлдим. Чўчиб уйғондим. Ҳеч бўлмаса, тушларимда Сиз билан дийдорлашаётганим ярим кўнглимга таскин беради. Сиз-ла кўришмоқ, елкангизга бош қўйиб, сизсизлик дардини унутмоқ илинжида кўз юмаман. Яратгандан тушларимга киришингизни сўраб ухлашга ошиқаман.
Гоҳида кундалик ҳаётда, олийгоҳда муаммоларга дуч келсам, қўлларим беихтиёр Сизнинг рақамларингизни теришга ошиқадию... Аммо... бирдан дод дегим келиб кетади бешафқат тақдир ҳукми дастидан... Бўғзимга аччиқ йиғи тиқилади. Кўзларимдаги алам ва хўрлик нишонаси - кўз ёшларни қайтаришга уриниб, дугоналаримдан узоқлашаман. Уларга чорасиздай кўринишни истамайман. Сиз ҳамиша, ҳар қандай вазиятда ҳам кучли бўлишга ўргатардингиз. Истаганингиздай бўлишга, ҳар доим ёнимдалигингизни, мени қўллаб турганингизни ҳис қилиб яшашга интиляпман.
Укамнинг нигоҳларида нигоҳингизни кўргандай бўламан. Сизсизликда унга далда бўлишга ҳаракат қиламану, бироқ унинг таскинларига ўзим муҳтожлигимдан ўкиниб кетаман.
Бувижонимнинг бу йўқотиш азобида чўкиб қолган қалбини, онамнинг ғам эзган юрагини, укаларимнинг кемтик кўнгилларини овутиш қўлимдан келмаётганидан изтиробга тушаман. Йўқотиш азоби нелигини ҳаммадан кўра кўпроқ англагандайман. Ўзимни кечагина бола ҳисоблардим, бугун эса анча улғайиб қолгандекман. Негаки, кечагина Сизнинг бағрингизда бахтиёр эдим. Борлигингиз мағрурлигим илдизларига туташиб кетган экан билсам...
Жаннат бугун манзилингиз,
"мен борман-ку" дер эдингиз,
"Кетмайман" деб алдадингиз -
сўроқ бўлди, дадажон.
Бизни дея кўп ёнганим,
ҳатто ўздан қизғонганим,
Афсус, Сизни ишонганим -
тупроқ бўлди, дадажон!
Севара ТОЛИБЖОНОВА,АДУ талабаси.
|