ҚАДРИ БАЛАНД ОПА-СИНГИЛЛАР, АЗИЗ ВА МЕҲРИБОН ОНАЛАР!

Сизларни гўзал ва тароватли баҳорнинг илк байрами, 8 март - Халқаро хотин-қизлар куни билан чин қалбимдан муборакбод этаман.

Халқимизда қадим-қадимдан аёлларга юксак эҳтиром кўрсатилади. Ушбу анъана, айниқса, истиқлол йилларида янада кенгайди. Шу ўринда таъкидлашни истар эдимки, мустақиллик йилларида юртимиз, хусусан, вилоятимизда хотин-қизларнинг мавқеи ва нуфузини кўтариш, аёлларнинг турмуш фаровонлигини ошириш, оналар ва болалар саломатлигини муҳофаза қилиш борасида салмоқли ишлар амалга оширилди. Ишончим комилки, бундан буён ҳам ана шундай хайрли ва ибратли ишлар изчил давом эттирилади.

Азиз ва лобар опа-сингиллар, қадрли онахонлар! Бугун Андижон аёллари илм-фан, ижод, тадбиркорлик, спорт, қўйингки, барча жабҳаларда ўзларининг фаолликлари билан юртимизнинг энг илғор вакилалари қаторидан ўрин эгаллаб келаётганликлари қувонарлидир. Бу ҳар биримизнинг қалбимизни фахрга тўлдиради.

Азиз аёлларимиз эъзозланадиган қутлуғ байрам арафасида барчангизга, энг аввало, тани сиҳатлик, узоқ умр, бахт-саодат, оилангизга тинчлик-хотиржамлик, дастурхонингизга қут-барака, юртимиз равнақи, фарзандларимиз тарбияси йўлида олиб бораётган ишларингизда улкан ютуқлар тилайман.

Қалбингиздаги жамики эзгу ниятларингиз ижобат бўлиб, Сизларга фарзандлар камолини кўриш, аёллик, оналик бахти насиб этсин.

Байрамингиз муборак бўлсин.

М. П. ЮНУСОВА, Андижон вилояти ҳокими ўринбосари,вилоят хотин-қизлар қўмитаси раиси.