ДЕПУТАТ АЁЛЛЛАРИМИЗ
ОИЛАМ ТИНЧЛИГИ МЕНГА КУЧ БЕРАДИ
Атрофимизда шундай инсонлар борки, иқтидори, изланиши хали бола пайтидаёқ бўй кўрсатади. Улардаги интилувчанлик, тиришқоқлик, мақсад сари дадил қадам қўя билишлик салоҳиятлари кишида илиқ таассурот уйғотади.
Мадинабону Қамбарова ҳам ўзининг кенг дунёқараши, интеллектуал салоҳияти билан атрофидагиларнинг меҳрини, ишончини тез қозона билди. Ундаги ҳуқуқ соҳасига бўлган қизиқиш она сути билан қалбга сингган бўлса не ажаб. Онаси олий тоифали юрист Одинахон Насретдинова қизининг ҳуқуқшунос бўлиш ҳақидаги орзуларига қанот берган. Мадинабону мактабни тугатгач, Фарғона давлат университетининг юридика факультетида таҳсил олди, университетни имтиёзли тамомлади. Таълимнинг магистратура босқичини эса Тошкент давлат юридик олийгоҳида давом эттирди.
Ўз меҳнат фаолиятини жиноят ишлари бўйича Андижон вилоят судида суд мажлиси котибаси сифатида бошлаган Мадинабону Қамбарова ўтган йиллар давомида катта тажриба орттирди. Кейинчалик у "Андижон электр тармоқлари" очиқ акциядорлик жамиятида катта ҳуқуқшунос, вилоят адвокатлар коллегияси адвокати вазифаларида самарали меҳнат қилди. Ҳозирда эса Андижон шаҳридаги "Андижон" адвокатлар ҳайъатида адвокат бўлиб иш олиб бормоқда. Ўзбекистон либерал-демократик партиясининг фаол аъзоларидан биридир.
Инсон ўзини жамиятнинг бир бўғини деб билар экан, унинг ривожи, юксалиши учун танлаган эзгу йўлидан оғишмай ҳаракат қилиши зарур. Мадинабону ҳам ўз фаолиятида, қолаверса, халқ депутатлари Андижон шаҳар кенгаши депутати сифатида фуқаролар, айниқса, аёллар ва ёшларнинг ҳуқуқий билимларини ошириш, жамиятимизда қонун устиворлигини таъминлаш, шунингдек, жамият учун хавфи катта бўлмаган ва жиддий оқибатларга олиб келмайдиган айрим жиноятлар бўйича жиноий жавобгарликни либераллаштириш сингари қатор йўналишлардаги жараёнларни такомиллаштириш, шунингдек, хотин-қизлар тадбиркорлигини ривожлантириш, уларнинг бандлигини таъминлаш масалаларига алоҳида эътибор қаратмоқда. У ўзи сайланган "6- Навбаҳор" сайлов округи сайловчилари билан тез-тез учрашиб, мавжуд муаммолар юзасидан фикрлашиб, муаммаларни ижобий ҳал этишга имкон қадар ёрдам беради.
Мадинабону фаол аёл, депутат, балки соҳанинг етук мутахассиси сифатида касби машаққатларига елка тутиб иш олиб бормоқда. Ундаги шижоат, ғайрат, талабчанликни кўриб, шубҳасиз, ўз ишининг билимдони эканлигига ишонч ҳосил қиласиз. Аёлликнинг борики заҳматларини иш фаолияти билан уйғунлаштира олган Мадинабону ҳар қадамда турмуш ўртоғи ва икки фарзандининг меҳридан куч олади. Улар билан ишдаги чарчоқларни унутади.
- Аёл бир қўлида бешикни, бир қўлида дунёни тебрата олгувчи зотдир, - дейди Мадинабону Қамбарова. - Аёлнинг фаолияти, энг аввало, оиласидаги тинчлик, хотиржамлик, аҳилликка боғлиқ. Шу боис ҳам мен оила юмушларини, фарзанд тарбиясини биринчи ўринга қўяман. Оилам тинчлиги менга куч, касбий ва депутатлик фаолиятимни бирдек олиб боришга имкон беради.
Мухтасар айтганда, оиласи ҳамда жамият иши учун фидойи, давримизнинг фаол ва илғор аёлларидан бири Мадинабону Қамбарованинг фаолияти бундан буён ҳам янада самарали бўлишига асло шубҳа йўқ.
Зилола РАҲМОНОВА.
|