АНДИЖОННИНГ АЁЛЛАРИ

Дунё кўрки, Сиздан олмиш андозалар,

Ўзбегимнинг бекалари - хонзодалар,

Уйимизнинг фариштаси - озодалар,

Нурдай тоза, гулдай нозик хаёллари,

Назокатли ўзбегимнинг аёллари.

Бор гўзаллик, ҳусн - чирой Cизда асли,

Офтоблар ҳам Сизни ширмой юзда асли,

Жаннат йўли, Сизлар босган изда асли,

Зулфи гавҳар, кокили зар - зилоллари,

Нафосатли Андижоннинг аёллари.

Ташаббусни бошлаб, ўзи ибрат бўлган,

Эрларни ҳам кўнглига шаҳд, шиддат солган,

Сиз эмасми, эътирофу, эъзоз топиб

Юртбошидан ташаккуру, раҳмат олган!

Кўзларида порлар меҳру жилолари -

Ориятли Андижоннинг аёллари.

Гулдан ширин, райҳон ифор - қизларингиз,

Кимга камтар, кимга кибор қизларингиз,

Керак бўлса тулпор миниб, кураш тушар

Шерларга хос, чунки, Сизнинг ҳисларингиз.

Ойни асир этар, қоши ҳилоллари -

Латофатли Андижоннинг аёллари.

Мадҳингизни таъриф этсам, минг бир байтда,

Кўнгил тўлмас, қўёлмасман шеърга нуқта,

Ой, Қуёшдек - Она битта, Ватан битта!

Юрт ҳуснига боқиб, гулгун жамоллари -

Малоҳатли Андижоннинг аёллари.

Сиз бунёдкор, Сиз келажак меъморисиз,

Сиз миллатнинг кўксидаги туморисиз,

Шу коракўз элнинг ғурур, ҳам орисиз,

Сиз-ла кулгай элнинг толе, иқболлари,

Саодатли, ўзбегимнинг аёллари.

Шаробиддин БОЛТАБОЕВ.