Ҳикматлар
ҚАЙТАР ДУНЁ
Бир йигит ўз отасини ҳақорат қилиб урганини кўрган одамлар нафратланиб, у адабсиз ўғилга ҳужум қилмоқчи бўлдилар. Йигитнинг отаси одамларни тўхтатиб:
- Биродарлар, ўғлимга ҳужум қилманг, бу ишда ўғлим эмас, ўзим айбдорман. Йигитлик вақтимда кунлардан бир кун худди мана шу ерда отамни ҳақорат қилиб урган эдим. Отамга қилган адабсизлигим жазосини энди кўриб турибман, отамга қандай муомала қилган бўлсам, бугун ўшандай муомала ўз ўғлимдан қайтди. Нимани эксанг, шуни ўрасан, деб жуда тўғри айтганлар. Мен ота-онамни ҳурмат қилмадим, дилларини оғритдим, у муборак зотлар мендан норози бўлиб кетдилар, энди ўғлим айбдор эмас, биродарлар, айб ўзимда, - деб ўксиниб-ўксиниб йиғлади.
Йигит отасининг сўзларидан таъсирланиб, дод-фарёд қилиб кўз ёшларини тўкди. Дарҳол отасини қучоқлаб, ўпиб, ундан узр сўради. Ота эмасми, у ҳам ўғлининг гуноҳини кечирди, унинг кўз ёшларини артиб, қучоғига олиб эркалади. Бу воқеанинг гувоҳи бўлган халқ ҳам таъсирланиб кўзларига ёш олдилар.
АЛЛОҲ ҚОШИДА ҚЎШНИЛАРНИНГ ЭНГ ЯХШИСИ...
Пайғамбаримиз Муҳаммад (с.а.в.) марҳамат қилиб, бундай дедилар: "Аллоҳ наздида дўст-ҳамроҳларнинг энг яхшиси ўз дўст-ҳамроҳига энг яхши муносабатда бўлганидир. Аллоҳ ҳузурида қўшниларнинг энг яхшиси қўшнисига энг яхши муносабатда бўлган кишидир".
Аллоҳ таоло ҳузурида қўшниларнинг энг яхшиси деган мақомга сазовор бўлишни истаган одам қўшнисига яхши муносабатда бўлсин, иншооллоҳ, ўша кишига юксак мартаба насиб этади. Охиратимизни обод қилишлигимиз учун Аллоҳ таоло кўплаб амал, восита ва имкониятлар эшигини очиб қўйган. Афсуски, билмаймиз ёхуд билсак ҳам уларга амал қилмаслигимиз сабаб ана шу имкониятлардан фойдалана олмаймиз. Азизлар! Қўшниларимизга ҳамиша яхши муносабатда бўлайлик, қўлимиздан келганча яхшилик қилайлик. Шоядки, шу амалимиз туфайли охиратда Яратганнинг ҳимоясида бўлиб, дўзах азобидан нажот топсак. Аллоҳ барчаларимизни нажот топгувчи бандалар қаторида бўлишлигимизни насиб этсин.
С. ТУРСУНОВ тайёрлади.
|