Иқтидорли ёшларимиз
БЕШ ЁШЛИ ЧЕМПИОН ҚИЗ
Бугун мамлакатимизда муҳтарам Юртбошимиз раҳнамолигида болалар спортини ривожлантириш, уларнинг соғлом ва баркамол вояга етишлари учун кенг имкониятлар эшиги очиб берилган. Бунинг натижасида спорт соҳасида улкан ютуқларни қўлга киритаётган болалар сафи йил сайин ортиб бормоқда.
Эндигина ўзининг беш ёшини қаршилаётган асакалик Суғдиёна Мамарасулова ҳам олти ойдан буён таэквандонинг ITҒ тури билан шуғулланиб келмоқда. Суғдиёнанинг спортнинг ушбу турига бўлган қизиқишини кўрган отаси уни тумандаги 58-умумтаълим мактаби қошидаги "Поспон" спорт клубига олиб келди. У ерда тўгарак раҳбари Валишер Ҳожиматовдан севимли спорти бўйича сабоқ олиб келмоқда.
Асака шаҳридаги 31-мактабгача таълим муассасаси тарбияланувчиси бўлган бу қизалоқнинг орзу ва мақсадлари бир олам. У келажакда жаҳон чемпионатларида ғолибликни қўлга киритиб, юртимиз байроғини кўкка кўтаришни ният қилган.
- Қизимни спортга бўлган қизиқиши ва интилишини кўриб, унга алоҳида эътибор беришимиз кераклигини тушундим ва тўгаракка олиб келдим, - дейди ёш спортчининг дадаси Отабек Сатторов. - Машғулотларга қатнагандан буён Суғдиёнанинг ўзига бўлган ишончи ортди. Бўйлари ўсиб, саломатлиги янада мустаҳкамланди. Ахир спорт билан шуғулланган инсон соғлом ва бақувват бўлиши табиий. Шу боис мен ҳам қизимнинг ташаббусини доим қўллаб-қувватлайман.
Суғдиёнанинг ушбу спорт тури билан шуғуллана бошлагани ҳали кўп бўлмаган бўлса-да, қатор ютуқларни қўлга киритди. Ўтган йилнинг ноябрь ойида бўлиб ўтган вилоят биринчилигида 18 кг. вазн тоифасида биринчи ўринни қўлга киритди. Декабрь ойида эса Қашқадарё вилоятида ўтказилган Ўзбекистон кубоги баҳсларида ўз вазн тоифасида ғолиб бўлиб, олтин медаль соҳибига айланди.
Эртанги кунга катта ишонч ва умид билан боқаётган жажжи спортчи қизга биз ҳам келгусида омад ва зафарлар ҳамроҳ бўлишини тилаб қоламиз.
Миролим ИСАЖОНОВ.
Суратда: ёш чемпион С.Мамарасулова.
|