БИЛИМДОН ЎҚУВЧИЛАР АНИҚЛАНДИ

Андижон вилояти касб-ҳунар таълими бошқармаси тасарруфидаги академик лицей ва касб-ҳунар коллежлари ўқувчилари ўртасида умумтаълим фанлари бўйича фан олимпиадасининг вилоят босқичи бўлиб ўтди.

Мамлакатимизда ўқувчи ёшларнинг ўз билим, иқтидор ва салоҳиятларини тўлақонли намоён этишларида фан олимпиадаларининг ўрни ниҳоятда катта. Шу боис ҳам ўқувчиларнинг фан олимпиадасига бўлган қизиқиши, унда иштирок этиш истагидаги билимдонлар сафи йилдан-йилга ортиб бормоқда. Бу бугунги ёшларнинг билимга чанқоқлигини, юртимизда улар учун яратиб берилаётган кенг имкониятлардан самарали фойдаланиш, интилиш, ўзларига, ғолибликка бўлган иштиёқни ўсиб бораётганлигининг ёрқин намунасидир.

Вилоятдаги академик лицей ва касб-ҳунар коллежларининг иккинчи ва учинчи босқичида таҳсил олаётган 1118 нафар ўқувчи 14 та умумтаълим фанлари бўйича бўлиб ўтган фан олимпиадасининг вилоят босқичида фаол иштирок этиб, ўз билим ва иқтидорларини синовдан ўтказдилар.

Якуний натижаларга кўра, белгиланган шарт ва топшириқлар асосида юқори ўринларга сазовор бўлган 21 нафар ўқувчи фан олимпиадасининг республика босқичида қатнашиш ҳуқуқини қўлга киритди.

Шунингдек, математика, физика, информатика, биология ва химия фанларидан юқори балл тўплаган 50 нафар ўқувчи халқаро фан олимпиадаси танловида иштирок этди.

Нигора ЎРМОНЖОНОВА.