ҚИЗЛАР САЛОМАТЛИГИ - СОҒЛОМ КЕЛАЖАК ПОЙДЕВОРИ

Вилоятимизда аёллар ва болалар саломатлигини муҳофаза қилиш ва мустаҳкамлаш масалаларига катта эътибор берилмоқда ва бу борада кўплаб амалий ишлар қилинмоқда.

Андижон педагогика коллежининг "Ораста қизлар" тўгараги қошида ташкил этилган "Ёш оила қурувчилар мактаби" клуби аъзолари ва 2-босқич ўқувчилари ўртасида ўтказилган "Репродуктив саломатлик. Қизлар саломатлиги - соғлом келажак пойдевори" мавзусидаги тадбир ҳам айнан шу масалага бағишланди. Тадбир доирасида оилавий ҳаёт остонасида турган ўсмир қизларнинг саломатлигини назорат қилиш, соғлом ва ҳар томонлама баркамол вояга етишларини таъминлаш, қизларни оилавий ҳаётга тайёрлаш, соғлом турмуш тарзи ҳақидаги тушунчаларини бойитиш, шунингдек, эрта ва қариндошлар ўртасидаги никоҳларнинг олдини олиш юзасидан саҳна кўринишлари, очиқ суҳбат ва баҳс-мунозара ҳамда чаққонлар беллашувлари бўлиб ўтди.

Ўқувчилар саҳна кўринишлари орқали тўйдан олдинги тиббий кўрикдан ўтишнинг муҳимлиги, ёшлар учун сарпо тўплашдан кўра, уларнинг саломатлиги, билим ва касб-ҳунар эгаллашига эътибор қаратиш зарурлиги каби муаммоларни ёритиб бердилар.

Бундан ташқари, Бутунжаҳон саломатлик куни муносабати билан коллежнинг бошланғич хотин-қизлар ташкилоти ва психологлари томонидан "Саломатлик ҳафталиги" ўтказилди. Ҳафталик давомида ўқувчилар билан турли давра суҳбатлари, маърузалар, спорт мусобақалари ва турли тадбирлар ташкил этилди. Уларда коллеж ўқувчи ва ўқитувчилари фаол иштирок этдилар, ғолиблар муносиб рағбатлантирилди.

Гулчеҳра МУЛЛАЖОНОВА,

Андижон педагогика

коллежи ўқитувчиси.