№26, 25.06.2015 Тадбир
ИЖТИМОИЙ ШЕРИКЛИК МУСТАҲКАМЛАНАДИ
Андижон шаҳрида Ўзбекистон Республикаси Олий Мажлиси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди томонидан давлат ижтимоий буюртмаси шаклида молиялаштирган ва "Меҳримиз сизга" аёллар ва уларнинг оила аъзоларини ижтимоий-хуқуқий қўллаб-қувватлаш маркази томонидан амалга оширилаётган лойиҳа доирасида "Биз соғлом турмуш тарафдоримиз!" мавзусида семинар-тренинг бўлиб ўтди
Андижон шаҳридаги маҳаллалар маслаҳатчилари, оилавий поликлиникалар патронаж ҳамширалари иштирок этган мазкур тадбирда аҳоли, айниқса, хотин-қизлар ва ёшлар ўртасида соғлом турмуш тарзини тарғиб қилиш бўйича давлат, нодавлат ва бошқа ташкилотлар ўртасидаги ижтимой шерикчиликни мустаҳкамлаш, бу борадаги ишларни юқори даражага кўтариш хусусида сўз юритилди.
- Тадбирни ўтказишдан кўзланган асосий мақсад, аҳоли ўртасида соғлом турмуш тарзини тарғиб этиш, фуқароларнинг тиббий маданияти ва саводхонлигини оширишда ижтимоий ҳамкорликни янада ривожлантиришдир, - дейди "Меҳримиз сизга" маркази раҳбари Холидахон Мирзараҳимова. - Ушбу тадбир, шубҳасиз, мазкур йўналишдаги ишлар самарадорлигини оширишга хизмат қилади.
Семинарда мутахассислар томонидан аҳолининг тиббий саводхонлигини ошириш, аҳоли ўртасида ва оилада соғлом турмуш тарзини оммалаштириш, бу борада давлат ва нодавлат ташкилотлари ҳамкорлигини кучайтириш юзасидан қизиқарли маърузалар ўқилиб, иштирокчиларга кенг тушунчалар берилди.
Тадбирда вилоят ҳокимлиги котибият мудири М. Низомова иштирок этиб, лойиҳанинг аҳамияти, умуман, соғлом турмуш тарзини шакллантириш борасидаги муҳим вазифалар хусусида гапирди.
Айни кунга қадар бу каби тадбирлар Асака, Шаҳрихон, Булоқбоши, Хўжаобод туманларида ҳам ўтказилди.
Муштарий КАТТАБОЕВА.
|