ПЕДАГОГЛАР АНЖУМАНИ

Заҳириддин Муҳаммад Бобур номидаги вилоят театрида халқ таълими муассасалари фаолиятини методик таъминлаш ва ташкил этиш Андижон шаҳар бўлими томонидан "Бетакроримсан, ягонасан, она Ватаним - Ўзбекистоним!" шиори остида ташкил этилган таълим ходимларининг анъанавий август кенгаши бўлиб ўтди.

Мактаб ва мактабгача таълим ҳамда мактабдан ташқари муассасалар раҳбарлари, амалиётчи-психологлар, "Маҳорат мактаблари"нинг тажрибали ўқитувчилари, "Йилнинг энг яхши фан ўқитувчиси" кўрик-танлови ғолиблари, бошланғич касаба уюшма қўмиталари раислари иштирок этган мазкур конференцияда сўз олган вилоят ҳокими Ш. Абдураҳмонов ва бошқалар мамлакатимизда халқ таълими тизимида амалга оширилаётган кенг кўламли ислоҳотлар, соҳага кўрсатилаётган эътибор ва ғамхўрлик, педагоглар олдида турган муҳим вазифалар хусусида гапирдилар.

Анжуманда янги ўқув йилини самарали ташкил этиш, таълим сифатини ошириш, шунинг-дек, "Мустақиллик дарслари"ни намунали ўтказиш билан боғлиқ қатор масалалар атрофлича таҳлил этилди. Иштирокчилар томонидан ёш мутахассис 13- умумтаълим мактаби ўқитувчиси Феруза Абдураимованинг намуна сифатида ўтиб берган "Мустақиллик дарси" юқори баҳоланди.

Анжуман сўнггида бир гуруҳ меҳнат фахрийлари ва фаол педагогларга таълим, фан ва маданият ходимлари касаба уюшмаси Андижон шаҳар кенгашининг эсдалик совғалари топширилди.

ЗИЛОЛА.