№45, 06.11.2014 Акс-садо
"БАҲОИМ "5" БЎЛСИН" ДЕСАНГИЗ...
Дугонам ўзи ўқиётган мактаб, ўқитувчиси ҳақида гапириб қолди. Ўқитувчиси уларга: "Мустақил иш ёзсангиз кўп вақт кетади, ҳам қийналиб қоласизлар. Шунинг учун пул йиғиб берсангизлар, мустақил иш ёзишга оид китоб оламиз". Устозимизга хўп дея, синфдошлар пул йиғиб бердик. Аммо ҳалигача "янги китоб"дан дарак йўқ.
Куни кеча эса "имтиҳонлар бошланяпти, баҳоим "5" бўлсин десангиз, мана шу хонага катта ва кичик тувакларда гул олиб келасизлар", деб айтди. Очиғи бундан хайратландик, ўқитувчимиздан ранжидик ҳам. Дарс бошланиши билан топшириқларни, уйга вазифаларни текшириш ўрнига "ўзининг чиқимлари", шахсий ташвишлари ҳақида сўз очади. Буни барча синфдошлар биргаликда директоримизга айтмоқчи бўлдик. Бироқ бундай қилиш нотўғри эканлигини ўйлаб, бу фикрдан қайтдик".
Дугонамнинг гаплари мени ҳам ўйлантириб қўйди. Чиндан ҳам бу каби ҳолатлар ҳақида тез-тез эшитиб турамиз. Ахир биз ёшлар мактабга билим олгани борамиз. Ўқитувчиларимизнинг бундай йўл тутиши ўқувчиларда билим олишга юзаки қарашни шакллантирмайдими, қолаверса, наҳотки, улар ўзларининг ҳурматини йўқотаётганларини сезишмаса?!
Азиз устозлар, одоб-ахлоқни, кийиниш маданиятини, сўзлашиш одобини биз - ёшлар, энг аввало, сизлардан ўрганамиз. Ўқиб билим олиб, олий ўқув даргоҳларига киришни, талаба бўлишни, ҳунарли, бирор соҳанинг етук мутахассиси бўлишни хоҳлаймиз. Бунда сиз - устозларнинг ўрнингиз катта. Минг афсуски, юқоридаги каби ҳолатлар Сиздай пок, меҳри дарё устозлар ҳақида салбий фикрларни юзага келтиришидан қўрқамиз ва бундай бўлмаслигини чин дилдан хоҳлаймиз. Шунинг учун ҳам сизларни ҳамиша қадрлаймиз, сизлардан ибрат оламиз, сизлардай бўлишга интиламиз.
Наима ДИЛШОДБЕКОВА.
|