"101" ОГОҲЛАНТИРАДИ!

ОЙЛИКНИ БЕТАЛОФАТ ЎТКАЗАЙЛИК!

Республикамизда 20 ноябрдан 20 декабргача ёнғин хавфсизлиги ойлиги ўтказилмоқда. Бундан мақсад, ёнғинлар келиб чиқишининг олдини олиш, ёнғин хавфсизлигини таъминлаш, шунингдек, бу борада мутасаддилар ва фуқаролар масъулиятини ошириш борасидаги ишлар самарадорлигини ошириш, тарғибот ишларини кучайтириш кўзда тутилган.

Олов - тилсиз ёв, деб бежиз айтишмайди. Кичик аланга катта ёнғинларга сабаб бўлиши мумкин. Жорий йилнинг ўтган ўн ойи сарҳисоб қилинганда, биргина Андижон шаҳрида фуқароларнинг эҳтиётсизлиги ва бепарволиги оқибатида 192 та ёнғин ҳодисаси содир бўлган. Ёнғинларнинг 115 таси аҳоли яшаш хонадонларида, 77 таси эса турли масканларда келиб чиққан. Бу кўнгилсизликлар натижасида 3 нафар инсон ҳаётдан бевақт кўз юмган бўлса, 8 нафар фуқаро турли даражада тан жароҳати олиб, шифохонага ётқизилган. Яна катта миқдорда моддий талофатлар кўрилди.

Ҳар бир инсон ўзи яшаб турган уйида, меҳнат қилаётган жамоасида, кўча-кўйда ёнғин хавфсизлиги қоидаларига риоя қилиши керак. Қўлбола электр иситгичлардан, ҳар хил газ тортиш мосламаларидан фойдаланмасак биз ўз ҳаётимизни, мол-мулкимизни талафотлардан асрай оламиз.

Азиз ҳамюртлар! Ёнғин хавфсизлиги ойлигини уюшқоқлик билан беталофат ўтказайлик!

Азизбек АБДУЛЛАЕВ,

Андижон шаҳар ИИБ ЁХБ

1- ХЁХО катта муҳандиси, сержант.