ЛУҚМА

ГАП БОЙЛИКДА ЭМАС

Йўналишдаги "Дамас"да, йўловчилар тўлишини кутиб ўтирган эдим. Машинадаги икки йўловчи аёлнинг суҳбати қизигандан қизиб қолди (Улар анча вақт кўришмаган дугоналар экан).

- Қизингни узатдингми, ўртоқжон?

- Э қаёқда, аввал уйни бекаму кўст қилиш керак.

- Кўнглинга олмагину қиз болани ёшини ўтказмай, вақтида узатиш керак.

- Мен ҳам шунга куяман-да, қизи 22 га кирдию эримнинг парвойи фалак. Лоақал эски, икки одам кирса учинчиси қисилиб қоладиган дарвозани алмаштирай демайди. Отасидан қолган дарвоза табаррук эмиш, ордона.

- Шунгаям диққат бўласанми? Келган совчилар дарвозангга сиғмай қолармиди? Маъқул жой бўлса, бериб қўя қол.

- Ўзинг ҳам чекка қишлоқда яшаб, замондан ортда қолиб кетибсан-да. Келаётган совчилар аввало, дарвозанга қарашади. У баланд, чиройли, янги модада бўлса, кейин остонангни хатлашади. Ахир дарвозанг чиройли бўлмаса, ортининг қандайлиги аён-ку. Бундан бу уйдагилар енг учида кун кўришади, қизига мебель қилиш тугул сепини ҳам тузукроқ қилишолмайди, деган хулоса чиқади, билдингми?

- Вой тавба! Замон шунақа бўлиб кетган, дегин. Менинг қизим ҳам 17 га кирди. Ўғлимни-ку уйлаб олдим. Энди 1-2 йил ичида уйни ўнглаш керак экан-да...

- Ҳа ўлма! Емасанг, киймасанг ҳам қизинг бор, уй-жойингни ўнглаб қўй, менга ўхшаб совчиларнинг қадамига зор бўлмайсан...

Шу орада "Дамас" тўлди ва жўнади. Манзилга етай деганимизда иккала аёл ҳам тушиб қолишди. Уларнинг гаплари мени ўйлантириб қўйди. Наҳотки, бугун келин олмоқчи бўлганлар фақат одамнинг бойлигига, уй-жойининг оддий ёки данғиллама эканлигига қараса...

Фикримни уққандек, орқа ўриндиқда ўтирган кекса аёл гап бошлади:

- Бу аёлни яхши танийман, бир маҳаллада ўсганмиз, тўрт кунлик ҳуснига бино қўйиб йўлидан адашганлардан. Эрини бир пулга олмайди. Эри бечора орият кучидан, болаларининг ҳурматидан бирга яшаб келяпти...

Онахоннинг сўзлари қалбидан нафрат билан чиқаётгани ҳис этиш қийин эмасди. Шунда совчилар дарвозаси эскилигидан эмас, унинг ўтмишию оиласидаги муҳит сабаб хонадонига қадам босмаётганликларини, "Онасини кўриб қизини ол" нақлига амал қилаётганликларини англадим.

Барно ШЕРАЛИ қизи .