№44, 30.10.2014 Шифобахш неъмат
ОЛТИН КУЗ ТУҲФАСИ
Маълумки, куз фаслида ўлкамизда кўплаб мевалар пишиб етилади. Уларни қайси ҳолатларда истеъмол қилиш керагу ва қандай ҳолатларда истеъмол қилиш мумкин эмаслигини билиб олиш фойдадан холи бўлмайди. Шунинг учун муштарийларимизга дўлана мевасининг фойдали хусусиятлари ҳақида маълумотлар бериб борамиз.
ДЎЛАНА - ОЧЛИКДАН ҲИМОЯ ҚИЛАДИ
Дўлана тоғда ўсувчи мевали дарахт. Унинг барглари ва гуллари ҳам шифобахш маҳсулот ҳисобланади. Бир ҳовуч дўлана истеъмол қилинса, кишини кун бўйи ташналик ва очликдан асрайди, яхши кайфият, бардамлик ва қувват бахш этади.
Ўлкамиз шароитида ўсадиган дўлана таркибида кўпроқ В1, В2, РР, С, Е витаминлари учрайди. Очилган гулларида 0,16 фоизга яқин эфир мойлари мавжуд. Дўлана ҳақида Абу Али ибн Сино шундай деб ёзган: "Дўлана сафрони сўндиради. Бошқа меваларга қараганда суюқликларнинг оқишини кучлироқ тўхтатади. Ич кетишини бартараф қилади ва сийдик тутилишини туғдирмайди". Шунинг учун ҳам кўплаб халқлар дўланани ич кетишида истеъмол қиладилар. Толиқишда, уйқусизликда, асабийлашганда, юрак оғриганда, климакс даврида, атеросклерозда, қон босими ошганда, бош айланиши, йўталда истеъмол қилиш фойда беради. Ҳозирги кунда фармацевтика саноатида дўлана гулларидан тайёрланган тиндирма ва турли бошқа гиёҳларга қўшиб тайёрланган дори воситалари атеросклероз, асаб тизими ва юрак-қон томир касалликларининг олдини олишда кенг қўлланилади. Шунингдек, дўлананинг эрта баҳордаги ёш новдалари пўстлоғи алаҳсираш ва ич кетишига яхши даводир.
Хосиятхон ЗИЯЙЕВА тайёрлади.
|