"ҚЎЙ ЙИЛИ" МУЧАЛИ СОҲИБЛАРИНИНГ ХУСУСИЯТЛАРИ

Қўй - беозор жонивор бўлганлиги учун ҳам йил тинч ва осо-йишта ўтиши башорат қилинади. Ушбу йил одамларнинг орзу-ниятларига эш бўлади. Шу боис, "Қўй" мучали остида туғилган инсонларни ёрқин йил қарши олмоқда.

Нафис дид ва санъат соҳиблари саналувчи ушбу мучал соҳиблари жуда ақлли ва заковатли кишилар ҳисобланишади. Ҳаёт кечиришлари кўпинча омадларига боғлиқ бўлади. Жавобгарлик ҳисси уларга бегона, ташаббус кўрсатишни ёмон кўришади. Уларда дид ва истеьдод бор. Аммо раҳбарликни эплай олишмайди. Лекин илмий, ижодий соҳада ўз ишларини қойилмақом бажаришади.

Улар қадди-қомати келишган, истараси иссиқ ва табиат шайдоси бўладилар. Қолаверса, ҳулқ-атвори, гап-сўзлари ёқимли, лекин бироз инжиқ ва хаёлпарастлиги, шу билан бирга, ўз тақдирларидан нолишлари ҳам бор.

Ушбу мучал соҳиблари тадбиру маросимларга кўп ҳолларда кечикадилар, Лекин ўзларига манфаат тегадиган иш бўлса, унга астойдил киришади. Бу йўлда бошқаларга ёқишни ҳам уддасидан чиқадилар. "Қўй"лар тижорат ишларидан узоқроқ юрганлари маъқул. Чунки савдо-сотиқ борасида унчалик уқувли бўлмайдилар. Ишқ-муҳаббат бобида ҳаётлари давомида кўп муаммоларга дуч келишлари мумкин.

Уларнинг ёшлик даврлари кексаликка қараганда анча тинч ва яхши ўтади. Яна "қўй"лар моддий жиҳатдан ғам-ташвиш чекишмайди. Уларнинг яқин маслаҳатгўйлари бўладики, доимо тўғри йўлни кўрсатадилар. Итоатгўй, камтар ва соддадил "қўй" мучали соҳиблари умри давомида осойишта ҳаёт кечирадилар.