"ЧИҒАНОҚ"

Керакли масаллиқлар: Тухум сариғи 3 та, сметана 100 мл., сариёғ 180 гр., ун 2 стакан, туз бир чимдим.

Начинкаси учун: Ярим стакандан шакар, ёнғоқ, майиз, 3 дона тухум оқига қўшиб аралаштирасиз.

Тайёрланиши: Сметана, туз ва тухум сариғини аралаштирасиз. Алоҳида идишда сариёғни унга булаб, қирғичдан чиқарасиз ва сметанали аралашмани қуйиб, хамир қорасиз. Кейин хамирни ёнғоқдек зувалачаларга бўлиб, 1 соат тиндирасиз. Ҳар бир зувалачани ёйиб, ичига начинка соласиз ва икки буклайсиз. Олдиндан қиздирилган духовкада ўрта оловда 30 дақиқа давомида пиширасиз. Тайёр бўлгач совутиб, устига қанд упасидан сепасиз.

МАРМЕЛАДЛИ ГЛАЗУРЬ

Керакли масаллиқлар: 1 стакандан шакар ва сув, 2 чимдим лимон кислотаси, 1 ош қошиқдан желатин ва эссенция, ичимлик ранг.

Тайёрланиши: Сув билан шакарни сирли идишга солиб қайнатасиз. 3-4 дақиқадан кейин оловдан олиб, унга желатин қўшасиз. Фақат желатин 3 ош қошиқ иссиқ сувга аввалдан бўктирилган бўлиши лозим. Кейин унга озгина ичимлик ранг ва лимон кислотасини, охирида эса эссенция қўшиб аралаштирасиз. Тайёр бўлгач, совутишга олиб қўясиз.

Глазурьни торт тайёрлаганда ҳам ишлатиш мумкин.

"Ўзбек миллий таомлари" китоби асосида

ГУЛИ тайёрлади.