№45, 03.11.2011 Пазанда маслаҳати
"МЕҲМОН УЧУН" ТАОМИ
Керакли масаллиқлар: 200 гр. қайнатиб пиширилган мол гўшти, 4 дона тухум, бир боғ кўкат, салат барги, туз ва зираворлар таъбга кўра.
Тайёрланиши: Тўртта пиёлани олиб, уларнинг ҳар бирига бир хил массада гўшт, кўкат, зираворлар соласиз ва тузини ростлайсиз. Устидан биттадан тухумни чақиб, охиста аралаштирасиз.
Тайёр бўлгандан сўнг мантиқосқонга сув қуйиб, пиёлалар билан териб чиқасиз. Мантиқосқон устини ёпиб, 30 дақиқа давомида пиширасиз.
Оловни ўчириб, пиёлаларни оласиз ва ликопга асталик билан тўнтариб соласиз. Таомнинг атрофини салат барги билан безайсиз ва устига озгинадан кўкат қирқиб қўясиз.
ОЛМАЛИ ПИРОГ
Керакли масаллиқлар: Тўртта тухум, 2 стакан ун, 4 та олма, 200 гр. шакар, ярим чой қошиқда ванелин, бир чой қошиқда кабартма, 200 гр. ёнғоқ мағзи, 200 гр. маргарин.
Тайёрланиши: Унга маргаринни кесиб солиб, қўл билан яхшилаб аралаштирасиз. Устига тухум сариғини, кабартма, ванелин солиб, хамир қорасиз. Хамирни сувқоғозга ўраб, илиқроқ жойга олиб қўясиз.
Бизе тайёрлаш учун тухум оқини идишга солиб, миксерда яхшилаб кўпиртирасиз. Охирида шакардан оз-оз солиб, кўпиртиришда давом этасиз. Олмани майда тўртбурчак қилиб тўғрайсиз.
Тинган хамирдан кичикроқ бўлагини олиб қўйиб, қолган қисмини жувада думалоқ шакл қилиб ёясиз. Пирог пиширадиган махсус думалоқ қолипга ялтироқ қоғоз (фалка) солиб, ёйилган хамирни жойлаштирасиз. Устига ёнғоқ мағзини, олмани, кейин эса олдиндан тайёрланган бизени қошиқ билан бир текис қилиб солиб чиқасиз. Сўнгра яна ёнғоқ мағзидан солиб, пирог устига аввал олиб қўйилган хамирни қирғичдан ўтказасиз.
Пирогни духовкада 150 даража ҳароратда 45 дақиқа давомида пишириб оласиз.
Тайёр бўлгач қолипдан чиқариб, бироз совутасиз. Дастурхонга тортишдан аввал аста кесиб, ликопларга соласиз.
"Таомнома" китоби асосида ГУЛИ тайёрлади.
|