Пазанда маслаҳати

"ОРЗУ" ТАОМИ

Керакли масаллиқлар: Бир кг. гўшт, бир стакан ун, 2 дона тухум, 150 гр. доғланган ёғ, 2 та пиёз, мурч, туз таъбга кўра.

Тайёрланиши: Гўштни алоҳида сувга солиб, қайнатиб пишириб оласиз. Кейин уни 10-15 гр. келадиган қилиб, тилимлаб кесасиз.

Озгина сувга туз солиб, тухум чақасиз. Яхшилаб аралаштириб, ун соласиз ва қаттиқроқ хамир қорасиз. Хамирни тиндиришга олиб қўйиб, пиёзни паррак-паррак қилиб тўғраб, қизиган ёғда қовуриб оласиз.

Зувалани уграга ёйгандек ёйиб, йирикроқ тўртбурчак шаклда кесиб чиқасиз. Сўнг уларни гўштни қайнатиб олган сувда пишириб, тузини ростлайсиз. Тайёр бўлгач, сузгичда сузиб олиб, товоққа соласиз. Устига жазланган пиёз солиб, атрофига тилимлаб кесилган гўштни териб чиқасиз. Шўрвани алоҳида косага қуясиз ва устига мурч сепиб, дастурхонга тортасиз.

АСАЛ ПИРОГ

Керакли масаллиқлар: Бир стакандан асал, қайноқ қилиб дамланган қора чой, туйилган ёнғоқ, шунингдек, 3 стакан ун, 100 гр. шакар, уч ош қошиқда ўсимлик мойи, бир чой қошиқда ичимлик содаси, бир ош қошиқда шакар кукуни.

Тайёрланиши: Асал билан шакарни чойда эритасиз ва содани унга қўшиб элаб оласиз. Сўнг ҳамма масаллиқларни қўшиб, хамир қорасиз. Махсус қолипни озгина ёғлайсиз ва хамирни ағдариб, текислайсиз. Кейин қиздирилган духовкада қизаргунча пиширасиз.

Тайёр бўлган пирогни олиб, совутасиз. Устига шакар кукунини сепиб, ликопларга кесиб соласиз ва дастурхонга тортасиз.

"Таомнома" китоби асосида ГУЛИ тайёрлади.