№45, 25.10.2012 ЛУҚМА
ГАПЧИ АЁЛЛАР
Уззу кун кўчада гаплашиб ўтирадиган баъзи аёлларни "Би-би-си агентлари" дейишади. Бундай аёллар ҳар кунги янгилик ва гапларни оммага етказиб туришади. Биз ҳам уларга зимдан қулоқ тутайликчи.
- Янги гапни эшиттийларми, (паст оҳангда) Абдусалимнинг қўйларини анавини боласи ўғирлаган экан, топилибди.
- Ҳа, биров эшитмасин, эшитдик.
- Эшматникида ўғри ток бор экан, мантёрлар ушлаб олишибди.
- Э, ток ўғри бўлмайди, ўша хонадоннинг эгаси ўғри.
- Вой ўлай, яхшиям эсимга солдиз. - Ўтирганлардан бири уйи томонга югуриб кетди.
Улар ана шу алфозда куннинг ярми ўтиб кетганини ҳам пайқамай қолишади.
- Эрим ишдан келадиган пайт бўлди мен бора қолай.
- Эсим қурсин газга чой қўйган эдим, нима бўлди экан?
Улар ҳар бири биттадан баҳонани ўртага ташлаб, уйларига тарқалишди.
- Булар намунча эрдан қўрқишмаса, - дейди гаплари чала қолган ёсуман аёл.
Кечки овқатланишга ўтираётган эрига хотин ахборот бера бошлади.
- Дадаси, бу йил қиш қаттиқ келар экан. Кўмирдан ғамлаб олинглар, дейишяпти.
- Э...э, кимдан эшитдинг бунақа совуқ гапларни.
- Ҳа, хотинлар айтишяпти.
- Агар хотинлар айтган бўлса бу гаплар тўғри бўлиб чиқади. Лекин ўтга (чўғ) борса ўттиз оғиз, элакка борса эллик оғиз гапиришлари ортиқча-да.
Абдуманноб ЙЎЛДОШЕВ.
|