№52, 13.12.2012 Пазанда маслаҳати
ҚОВУРМА КАРТОШКА
Керакли масаллиқлар: 500 гр. картошка, 1 дона лимон, 1 литр ўсимлик мойи, туз таъбга кўра.
Тайёрланиши: Картошкани пўстидан арчиб, тозалаб ювасиз. Кейин уни махсус асбобда гулли шаклда қилиб тўғрайсиз. Картошкани кусиратиб пиширишни хоҳласангиз, тўғраганингиздан кейин уларни дастурхонга 10-15 дақиқага ёйиб, кейин доғ бўлган ёғда қовурасиз ва тузини ростлайсиз.
Тайёр бўлган таомни ликопларга солиб, ёнига бир тилимдан лимон қўйиб, дастурхонга тортасиз.
ТУХУМЛИ РУЛЕТ
Керакли масаллиқлар: 3 дона тухум, 2 дона сосиска, 1 дона сабзи, 1 боғ кўк пиёз, 100 гр. ўсимлик мойи.
Тайёрланиши: Тухумни лаганга солиб, яхшилаб аралаштирасиз. Сўнг таъбга қараб, туз соласиз. Сосиска билан сабзини тўртбурчак шаклда, кўк пиёзни ҳам майда қилиб тўғраб оласиз. Ҳамма масаллиққа тухум билан озгина ўсимлик ёғи қуйиб, яхшилаб аралаштирасиз.
Қизиган товага оз миқдорда доғ бўлган ўсимлик мойи қуйиб, тайёр масаллиқни соласиз ва духовкада 15 дақиқа давомида паст оловда пиширасиз. Пишгандан сўнг уни рулет шаклида ўрайсиз. Тайёр бўлган рулетли тухумни дастурхонга кўкатлар билан безатилган холда келтирасиз.
"Тўмарис мерослари" ўқув маркази пазандалик курси раҳбари Дилнозахон ШОКИРОВА тайёрлади.
|