ЁШЛАР ФИКРИ

КИТОБИМ - ОФТОБИМ

Китобни бежиз офтобга қиёсламайдилар. Қуёш бутун оламни ўзининг заррин нурлари билан ёритса, китоб дилларни илм-маърифат нури билан мунаввар этади. У олимлар фикрларига тўлган мўътабар хазина, донишмандлар ҳикматларининг бўстони. Шарқ олимларидан Муҳаммад Абал Фудийнинг шундай сўзлари бор: "Бир дўстки ҳеч кимга бермагай азоб, узоқ синаб кўрдим, билсанг у - китоб".

Кимки китоб билан дўстлашса, зеҳни ўткирлашади. У билимнинг ҳеч қачон беркилмайдиган қайнар булоғи. У инсонни мозийда ҳам, бугундан ҳам хабардор этади. Муҳими, у ўқувчидан ҳеч нарса талаб қилмайди, фақатгина уни камолга етказади.

Китоб инсонга ҳаётда жуда кўп ёрдам беради. Бошига бирор ташвиш тушса, оқил ва доно маслаҳатчига айланади.

Бугун тенгдошларимизнинг айримлари китобдан кўра интернет сайтларидан кўпроқ фойдаланмоқдалар. Тўғри, интернетнинг ҳам кундалик ҳаётимизда ўзига яраша ўрни, аҳамияти бор. Аммо бир нарсани ёддан чиқармаслик керак. Интернет инсонга китобчалик дўст бўла олмайди.

Бугунги ёшлар, назаримда, яна-да кўпроқ китоб ўқишлари лозим. Китоб ўқиган кишининг дунёқараши кенг, салоҳияти юксак, фикрлаши теран, атрофдаги воқеаларга муносабати тўғри шаклланган бўлади.

Келинг, азиз тенгдошлар, китобни энг яқин ҳамроҳимиз, дўстимиз билайлик. Зеро, у бизга йўлчи юлдуз каби хизмат қилади.

Муқаддасхон ТОШТЕМИРОВА, Андижон санъат коллежи ўқувчиси.