КЎНГИЛ ИЗТИРОБИ

ГУНОҲСИЗ ГУНОҲКОРМАН

Дугонам билан жуда иноқ эдик. Коллежни битириб, университетга бирга ҳужжат топширдик. Омадимиз бор экан, иккимиз ҳам талаба бўлдик.

Ўша пайтлари биз энг бахтиёр инсонлардан бири эдик. Курсдошлар билан тез чиқишиб олдик. Айниқса, Отабек исмли курсдошимиз дугонам Гулнорага ҳаммадан ҳам бошқача эътибор билан қарарди. Гулнора ҳам унга бефарқ эмасди. Сабаби Отабек келишган, ақли расо, бир сўзли йигит эди. Аммо уларнинг иккиси ҳам юрагидаги ҳисни пинҳон тутишарди.

Қувноқ ёшликнинг ширин дамлари ила тўртинчи босқичга ҳам етиб келдик. Ўқиш якунланишига оз фурсат қолганда олийгоҳимизга чет элда ўқиш имкониятини берувчи танлов ўтказилди. Гуруҳимиздаги энг зеҳнли бўлган Отабек шу танловда қатнашиб, имтиёзни қўлга киритди. Отабек чет элга ўқишга кетиш олдидан Гулнора билан учрашиб, дил изҳор қилди. Бир йилдан сўнг қайтиб келиб унга уйланишини айтди.

Биз курсдошлар Отабекка "оқ йўл" тиладик...

Қўлимизга диплом текгач мен ва Гулнора бир мактабга ишга жойлашдик. Дугонам энди ҳотиржам, Отабекнинг келишини кутиб кун санар, унга ишониб келаётган совчиларга рад жавобини берарди.

Кунлар шу тарзда бир-бирини қувлашиб ўтарди. Бу орада мен интернет тармоғига уланиб, "одноклассники"да исм-шарифимни ўзгартириб, ўз профилимни очдим. Ҳаммаси шундан кейин бошланди. Гулноранинг илтимоси билан Отабекни сайтдан излай бошладим. Уни топиш қийин бўлмади. Биз дўстлашиб олдик. Аввалига ўзимни таништирмоқчи бўлдим. Бироқ ичимдаги шайтон "уни синаб кўр балки, Гулнорага муносиб эмасдир, интернет орқали бошқа қизлар билан ҳам гаплашиб турар" деб гумонимни оширарди.

Хуллас, энг яқин дугонамдан изн сўрамай унинг севган инсони билан хат ёзиша бошладим. Афсуски, бир-икки соатлик "суҳбатимиз"дан сўнг Отабек мени Гулнор деб гумонсирай бошлади. Турли ёлғонлар тўқиб, умуман бошқа қиз эканлигимни айтдим. Отабек нотўғри хулосага келиб, Гулнора билан орани очиқ қилди. Бу гапларни эшитган дугонам "менга ишончи бўлмаган инсонни нега севишим, кутишим керак?" дея кўз ёш тўкди.

Бу орада Гулноранинг ота-онаси келаётган совчиларнинг бирига розилик бериб юборишди. У ҳам бунга қаршилик қилмади. Тез орада тўй ҳам бўлиб ўтди...

Гулноранинг гуноҳсиз гуноҳкор бўлишига, айбсиз айбланишига мен сабабчиман. Нимага ҳам ўша интернет деб аталмиш "балога" йўлиқиб хат ёзишдим? Дугонамга асло ёмонликни раво кўрмагандим.

Дугонам олдида гуноҳкорман. Мен шу ўринда тенгдошларимга айтмоқчиманки, интернетга уланиб, турли сайтларда вақтингизни зое кетказманг. Интернетдан тўғри фойдалана билмаслик ёки у орқали бемаъни ёзишмалар сизни чоҳга етаклаши мумкинлигини унутманг.

Оққа кўчирувчи НОДИРА.