Янги китоб

ҚУЛАЙ МАТЕМАТИКА

Юртимизда ёш авлод таълим-тарбиясига бўлган эътибор кундан-кунга ортиб бормоқда. Айниқса, болаларнинг ҳар бир фанни ўқиб-ўрганишлари учун қулай дарсликлар яратилаётгани ана шу эътиборнинг бир кўринишидир. Бундай қўлланмаларнинг муаллифлари орасида иқтидорли ёшларимизнинг борлиги кишини ғурурлантиради.

Ана шундай иқтидорли ёшларимиздан бири Булоқбоши педагогика ижтимоий-иқтисодиёт коллежи ўқувчиси Мадинабону Абдуллаевадир. Болалигидан математика фанига қизиқиши баланд бўлган Мадинабону ўз изланишлари ва бу борадаги билимларини бошланғич синф ўқитувчилари ва ўқувчилари учун яратган "Математика" ҳамда "Бошланғич синфларда математика фанини ўқитишда мисол ва масалалар ечиш" номли услубий қўлланмаларига жамлаган.

Математика болаларда тафаккур, диққат, хотира, фикрлаш каби фазилатларнинг ривожланишида муҳим аҳамиятга эга. Шунинг учун ҳам қуйи синфларданоқ бу фанни яхши ўрганишларига эътибор бериш керак. Бу борада ушбу услубий қўлланма умумтаълим мактабларининг бошланғич синф ўқувчилари учун математика фанини ўрганишларида жуда қулай.

Мадинабонунинг бундан буён ҳам ўқиб-ўрганишдан, изланишдан толмаслигини, билим ва кўникмаларини юксалтириб боришини тилаб қоламиз.

ТАҲРИРИЯТ.