ИЙД РАМАЗОН МУБОРАК

Яратган Роббимизга беҳад ҳамду сано ва шукурлар бўлсинким, барчаларимиз Рамазон ойи рўзасини имкон қадар тутиб, Аллоҳ таоло ваъда қилган улкан мукофотни қабул қилиш куни бўлган Фитр хайити каби улкан шодиёна кунида турибмиз.

Рамазон ойи мурувват, хайр-эхсон, яхшилик қилиш, ўзаро иттифоқлик, дўстлик, ҳамкорлик ойи бўлгани учун ҳам юртимиз мусулмонлари ўз ҳаётларида ана шу хислат ва сифатларни татбиқ қилиб, Аллоҳнинг катта ажр-савобларга сазовор бўлишди. Расули акрам (с.а.в.) хайит кунининг кечасини Аллоҳдан катта мукофот олиш вақти деб атаганлар. Кечагина барча мўмин-мусулмонлар емак ва ичмакдан ўзларини тийиб, фақат тоат ва ибодат билан машғул бўлган бўлсалар, бугун Аллоҳ таолонинг неъматларидан, ажр-савобларидан бахрамандлик хурсандчилик ва шод-хуррамлик айёмига етишдилар. Дарҳақиқат, Ислом дини хайит бир-бирларига ғамхўрлик қиладиган ва хурсандчиликлар қилишга ижозат берган кундир. Юртимизда ҳам хайит кунлари дам олиш куни, байрам сифатида кенг нишонланиб келинмоқда.

Пайғамбаримиз (с.а.в.) бир ҳадиси муборакларида: "Бева ва мискинга ғамхўрлик қилувчи киши Аллоҳ таоло йўлида саъй-ҳаракат қилувчи ёки кечалари тоат-ибодат қилиб, кундузлари рўза тутувчи киши кабидир", - дедилар. Азизлар, ушбу ҳадиси шариф мазмунига кенгроқ фикр юритиб қарасак, етимларга, бева-бечораларга, боқувчисини йўқотганларга ва ёрдамга муҳтожларга кўмак бериш ва уларнинг дуоларини олиш, ҳолларидан хабар олиш нақадар катта савоб амал эканига яна бир бор ишонч ҳосил қиламиз.

Зеро, Рамазон хайити кунида барча мусулмонлар бир-бирларини муборакбод этиб, табаррук отахон-онахонларга узоқ умр, имон, ёшларга рушди хидоят тилашади. Қариндош-уруғларини, ёру биродарларни зиёрат қиладилар, ўз яқинлари ва беморларнинг ҳолидан хабар оладилар. Бу кунда мана шундай яхши амаллар ҳар бир эзгу ниятли инсонларнинг қалб эҳтиёжига айланади. Бирор бир сабабга кўра аразлашган, таниш-билишлар хайит кунларида бир-бирларига қучоқ очадилар, ўзаро узр сўрашадилар. Чунки кечиримли ва меҳр оқибатли бўлиш ҳар бир мусулмон учун ҳам қарз, ҳам фарздир. Рамазон хайитининг арафа куни жуда фазилатли амал ҳисобланади.

Абдуллоҳ ибни Масъуд (р.а) Пайғамбаримиз (с.а.в.) дан ривоят қиладилар: "Мўмин бандалар Рамазон ойининг рўзасини бутун тутиб, хайит куни намозгоҳга йўл олганда, Аллоҳ таоло фаришталарига: "Эй фаришталар, бировнинг хизматини адо этган киши хизмат ҳаққини талаб этади. Бандаларим менинг рўзамнинг хизматини адо этиб, ҳақларини олиш учун намозгоҳга бормоқдалар. Сизлар гувоҳ бўлинглар, уларни мағфират қилдим", - дейди. Шунда фаришталар: "Ё Мухаммад (с.а.в.) умматлари, энди уйларингизга боринг-лар, Аллоҳ таоло гуноҳларингизни кечирди", - деб нидо қиладилар".

Анас ибни Молик (р.а.) ривоят қиладилар, Расулуллоҳ (с.а.в.): Кимки фитр садақасини хайитдан илгари адо этмаса, унинг рўзаси ер билан осмон ўртасида муаллақ ҳолда қолади. Фитр садақаси берилганидан сўнг, Аллоҳ таоло унинг рўзасига иккита яшил қанот ато этади ва рўзаси парвоз қилиб, еттинчи осмонгача боради ва аршдаги қандилга қўниб, ўз эгасига розилигини изҳор этади" - деб марҳамат қилдилар.

Ривоят қиладиларки: "Хазрати Усмон ибни Аффон (р.а.) бир маротаба Фитр садақасининг хайитдан олдин беришни унутиб қўйган эканлар. Хайит намозидан сўнг эсларига тушиб, Фитр садақасининг ўрнига бир қул озод қилдилар, сўнг Пайғамбаримиз (с.а.в.) ҳузурларига бориб: "Ё Расулуллох, фитр садақасини хайитдан олдин беришини унутган эканман. Фитр садақасининг ўрнига бир қул озод қилдим", - дедилар. Шунда Расулуллох (с.а.в.): "Ё Усмон, юзта қулни озод этганнинг савоби фитр садақасини хайитдан илгари берганликнинг савобига тенг бўлмайди" - деб марҳамат қилдилар. Демак, фитр садақасини ўз эгаларига ўз вақтида беришлик жуда фазилатли амал ҳисобланади.

"Фитр садақасини хайитдан олдин адо этганга Аллоҳ таоло ўнта яхшилик ато қилади: 1.Уни гуноҳлардан пок этади. 2. Дўзах оташидан сақлайди. 3. Тутган рўзасини қабул қилади. 4. Ана шу бандасига Беҳиштни вожиб қилади. 5. Қабрдан соғ-саломат турғизади. 6. Ана шу йилда қилган яхши амалларини қабул қилади. 7. У бандасига шафоъатул Мустафони вожиб қилади. 8. Сирот кўпригидан яшин тезлигида ўтказади. 9. Мезон тарозусида унинг савобларини оғир қилади. 10. Унинг исмини бадбахтлар, бахтсизлар қаторидан чиқариб ташлайди", - деб марҳамат қилдилар.

Ватанимиз истиқболи порлоқ, юртимиз тинчлиги ва осойишталиги бардавом, халқимиз фаровонлиги янада зиёда бўлишини Яратгандан сўраб қоламиз. Яна бир бор Рамазон хайитингиз муборак бўлсин, азиз ватандошлар!

Шаробиддин МУСАБОЕВ,

Андижон шаҳридаги

"Абу-Хурайра" жомеъ

масжиди имоми.

Санжарбек МАМАНАЗАРОВ,

Олтинкўл туманидаги "Оқтепа" жомеъ масжиди имоми.