№50, 10.12.2014 ОТА-ОНА ОЛДИДА ҲАМИША ҚАРЗДОРМИЗ
Оила муносабатлари меҳр-муҳаббат, ўзаро ишонч ва садоқат ришталари ила боғланади. Бунда ота-она ва фарзандлар ўртасидаги муносабатлар муҳим саналиб, ўғил-қизларнинг ўз ота-онаси олдида муайян ҳақлари бўлгани каби ота-онанинг ҳам фарзандлари олдида ҳақлари бор.
Фарзанднинг туғилиб, ақл-ҳушини танишида, вояга етиб, билим ва касб эгаллашида, комил инсонлар қаторидан жой олишизда ота-онанинг улкан ҳиссаси борлигини ҳеч ким инкор этолмайди.
Дарҳақиқат, ота фарзанднинг дунёга келишига сабабчи бўлади, отанинг тарбияси ўғил ёки қизнинг камол топишида муҳимдир. Бу борада оналарнинг хизматлари ниҳоятда катта. Расули Акрам (с.а.в) "Жаннат оналарнинг оёқлари остидадир" деганлар ва умматларидан бу дунёда жаннат излаганларни оналарини рози қилишга, уларнинг дуосини олишга тарғиб қилганлар. Бир аъробий Пайғамбар (с.а.в)дан: "Менда отамнинг ҳаққи кўпми ёки онамнинг? " деб сўраганида у зот уч мартага "Онангнинг ҳаққи" деб жавоб қайтарганлар ва тўртинчи бор сўралганида "отангнинг" дея жавоб қайтарганлар.
Улуғ алломаларимиз ҳам фарзандлар ота-оналари учун меҳр-муҳаббатини, бутун ҳаётини бахшида этиб уларнинг розилигини ва дуоларини олишлари кераклигини уқтиришган. Абу Усайд (р.а)дан ҳикоя қиладилар: "Биз Расулуллоҳ ҳузурларида эдик, шу пайт бир киши: "Ё, Расулуллоҳ, ота-онамнинг ҳаёт вақтларида қилган яхшилигимдан ташқари уларнинг вафотидан кейин яна нима қилсам, шу яхшилигим давом этади?" - деб сўради. Улар жавоб бердиларки, "тўртта нарсани қилиб юрсанг, уларга яхшилигинг давом этади. Уларнинг биринчиси - ота-онанг ҳаққига дуо қиласан ва гуноҳларини кечирмоқликни Аллоҳ Таолодан сўрайсан, иккинчиси - уларнинг насиҳат ва васиятларини амалга оширасан, учинчиси - дўстларини ҳурматлайсан ва тўртинчиси - қавм-қариндошлар билан улар туфайли қарор топган қариндошлик алоқаларини узмайсан", деб жавоб бердилар.
Барчамизга фарзандлик бурчини бекаму кўст адо этишлик, ота-оналаримизни рози қилиб, Аллоҳ таолонинг ризолигига эришадиган бандалар қаторида бўлишлик насиб этсин.
Баҳодиржон РЎЗИБОЕВ,
Андижон шаҳридаги "Боботаваккул" жомъе масжиди имоми.
|