№5, 29.01.2015 Ҳадислар
ДУНЁДА КИШИЛАРГА ЯХШИЛИК ҚИЛГАНЛАР ОХИРАТДА УНИНГ МУКОФОТИГА ЭГА БЎЛАДИ
Қўбайса ибн Бурма ал-Асадий (р.а.) айтадилар: Мен Расулуллоҳ ҳузурларида эдим. Шу пайтда Расулуллоҳ: "Бу дунёда яхшилик қилган кишилар охиратда яхшиликка эришадилар ва шариатда ёмонлик деб саналган ишларни қилувчилар охиратда ёмонликка дучор бўладилар", - дедилар.
Ҳармала ибн Абдуллоҳдан ривоят қилинди. У киши бир неча отлиқ ҳамроҳлари билан ўз юртидан чиқиб, пайғамбаримиз ҳузурларига келдилар. Расулуллоҳ ҳузурларида бир оз турганларидан кейингина пайғамбаримиз у кишини танидилар. Расулуллоҳ у ердан қўзғалганларидан кейин деди: "Мен Расулуллоҳ ёнларига бориб турсам кўпроқ илм ўрганаман", - дедим-да, пиёда юриб ёнларига бориб тик турдим ва: "Ё Расулуллоҳ, менга нима иш қилишимни буюрасиз?" - деб сўрадим.
Расулуллоҳ: "Эй Ҳармала, яхши деб ҳисобланадиган ишни ва ёмон дейилган ишлардан ўзингни торт!" - дедилар. Мен кейин қайтиб ўз жойимга бордимда, яна Расулуллоҳ олдиларига келиб, у зотга яқинроқ ерда турдим ва аввалги саволимни яна қайтардим. Расулуллоҳ яна ҳудди ўша жавобни қайтардилар-да: "Эй Ҳармала! Кишилар олдидан чиқиб келмаганингда орқангда гапирадиган гаплардан қайси бири сенга маъқул бўладиган бўлса, ўшани қил! Аммо маъқул бўлмайдиган бўлса ундан ўзингни сақла," - дедилар.
Шундан кейин мен ўз жойимга бориб, Расулуллоҳнинг шу қисқа насиҳатларини ўйлаб кўрсам, у ҳамма нарсани ўз ичига олган пурмаъно сўзлар эканини билдим, дедилар.
Санъатбек ТУРСУНОВ тайёрлади.
|