№19, 05.05.2016 Ҳикмат
ФАРЗАНД ТАРБИЯСИ
Ота-оналарнинг оила, жамият, бутун ер юзи ва Яратганнинг олдидаги энг муҳим мажбурияти фарзанд тарбиясидир. Бола ота-онаси ҳузуридаги омонат бўлиб, унинг қалби оппоқ қоғозга ўхшайди. Унга исталган суратни чизса бўлади. Агар яхшиликка ўргатилса, ўшандай ўсади. Унинг савобига ота-онаси ва мураббийси шерик бўлади. Агар ёмонликка ўргатилса, унинг гуноҳига ота-онаси ва мураббийси шерик бўлади.
Тарбия ота-оналарнинг бурчи ва фарзандларнинг ҳаққидир. Бу борада Пайғамбаримиз (с.а.в.): "Ҳеч бир ота ўз фарзандига яхши одоб ўргатишдан ортиқ ҳадя қилаолмайди" дея марҳамат қилганлар.
Биз ҳозирги кунда тарбиянинг аҳамиятини фарзандлар ота-оналарига қилаётган ҳурматсизликларида кўрамиз. Ёмон тарбия топган фарзанд ота-онасига овозини кўтаряпти, гап қайтариб, уларнинг насиҳатларига қулоқ тутмай мутлақо ёт бўлган "дўстлар"нинг "насиҳатлари"га эргашиб кетяпти. Опа-сингил, ака-ука, қариндош-уруғларнинг ҳолидан хабар олмаётганлар қанча...
Лекин ўзининг яхши тарбияси билан оиласига, жамиятимизга фахр бўлаётган фарзандлар ҳам кўпдир. Улар ўз имкониятларини ишга солиб она-юртимизнинг ривожи, гуллаб-яшнаши учун муносиб ҳиссаларини қўшмоқдалар.
Достонбек СУЛТОНОВ,
Саййид Муҳйиддин махдум номли Андижон ўрта махсус ислом билим юрти ўқувчиси.
|